Jaco van Zyl (in die strepieshemp) ontleed die paduitleg saam met spanlede. | Oud word nuut by dié berghotel in Franschhoek
18 Februarie 2005
2006.01.27 gewysig om veranderinge in produkreeksname aan te dui
Deur Pavatile se verslaggewer
Ek moes eintlik 'n trui gebring het. 'n Mens vergeet maklik dat daar soms bo in die berge 'n windjie waai.
Die bruingebrande brekers op die bouperseel let natuurlik nie eers op daar's wind nie, tensy daar nou 'n boom sou omval. Dis nou manne soos Tommie Eigelaar, die Projekbestuurder; Nico Nel van Nuet Civils, wat verantwoordelik is vir die grondwerke; Jaco van Zyl van Nortjé & de Villiers Raadgewende Ingenieurs; en Neels Grundlingh (Paving Friend) wat heelpad van George af gekom het om met sewe van sy eie manne en nog 'n paar van die omgewing te kom plaveisel lê.
Die hotel waaraan daar verbou worrd, was dekades lank bekend as die Swiss Farm Excelsior en later as die Franschhoek Mountain Manor, en sal na sy vernuwing in die luuksheidsidioom van "The Ritz" en "The Grace" eenvoudig as "The Franschhoek" bekendstaan. Heelwat van Pavatile se plaveisel — veral die duursame ClassiCobble 75 — is deur ontwerper Tanya de Villiers van CNdV Africa vir hierdie projek gespesifiseer.
Saam met Marius Cloete van Pavatile, bekyk die manne na Tanya se plan op die kap van die bakkie. Maar dis 'n ou plan, en boonop lyk asof daar 'n reguit patroon om 'n kinkel in die pad moet loop. Hmmm, dit kan 'n bietjie sukkel.
"As ek sukkel, dan kry ek 'n ander manier om die ding te doen, " sê Jaco.
Marius stel 'n uitleg voor wat vinniger, beter en makliker sal pak en nogtans aan Tanya se estetiese vereistes voldoen. |